Avelaíña conmemora o Día Mundial da Saúde Mental baixo o lema “SAÚDE MENTAL, UN DEREITO NECESARIO”

A pandemia provocada polo COVID sacou a luz,  con maior forza que nunca, a fraxilidade da saúde mental e a necesidade de prestarlle atención de urxencia. Por iso, con motivo do Día Mundial da saúde mental, que se celebra o 10 de outubro, baixo o lema  “saúde mental, un dereito necesario” AVELAÍÑA está a organizar unha serie de actividades nos concellos onde ten presenza

A Guarda, a 08 de outubro de 2021.- O 10 de outubro celébrase o Día Mundial da Saúde Mental, conmemoración que pretende sensibilizar e informar sobre a importancia do coidado da saúde mental e a defensa dos dereitos das persoas que teñen algún problema desta índole. Este ano, o tema elixido a nivel mundial para esta conmemoración é a saúde mental nun mundo desigual, chamando a atención sobre aqueles factores que impiden que o coidado da saúde mental poida chegar a todas as persoas en igualdade de condicións.

A este propósito, baixo o lema “saúde mental, un dereito necesario”, aliñado coa temática mundial desta conmemoración, A entidade pretende  denunciar as desigualdades que existen ao redor da saúde mental e que poden ocorrer por diversos motivos (económicos, por idade, por xénero, por educación ou por lugar xeográfico), así como reivindicar a importancia de que a atención á saúde mental sexa igual para todas as persoas. Ademais, o lema pretende concienciar sobre o feito de que a saúde mental afecta a todo o mundo e que, por iso, todos e todas debemos coidala.

Marea verde nos Concellos en sinal de apoio

Unha destas actividades, será o alumeado en cor verde, a petición de Avelaíña,  dos edificios  dos CONCELLOS  onde Avelaíña presta os seus servizos,  en sinal de apoio a saúde mental  e co obxetivo de dar visibilidade á situación  deste colectivo.

Mesas informativas en Tomiño, Nigrán e Ponteareas

Avelaíña instalou  mesas informativas co obxetivo de sensibilizar e informar sobre a importancia do coidado da saúde mental, sobre o traballo que realiza a Asociación e os recursos da Contorna.