Historia
Baixo miño
Avelaíña ten a súa orixe no ano 1997, froito da unión e loita por un recurso específico na comarca do Baixo Miño (Pontevedra), onde non existía ningún recurso de atención á saúde mental e onde os psiquiatras que se desprazaban cada 15 días a A Guarda deixaran de facelo.
Avelaíña comezou atendendo as necesidades básicas de saúde mental dun grupo reducido de persoas no antigo colexio “Manuel Rodríguez Sinde”, situado no municipio de A Guarda.
Desde alí comezou a prestar atención a toda a comarca do Baixo Miño (Concellos de Santa María de Oia, A Guarda, O Rosal, Tomiño e Tui).
No ano 2006 a Asociación logrou a cesión polo Concello da Guarda da Escola Unitaria da Portela, co obxecto de establecer alí a súa sede. En 2007, Avelaíña comezou a prestar aí os seus servizos, onde actualmente se atopa a sede principal da asociación, un Centro de Rehabilitación Psicosocial e un Piso Supervisado.
Val miñor
O proceso de expansión da asociación continuou pola comarca do Val Miñor, ante a necesidade dalgúns usuarios que se desprazaban ata a Guarda para recibir atención.
Tras pasar por diversos enclaves (Gondomar, Nigrán e Ramallosa) e unha gran serie de xestións e contactos, no ano 2013 a asociación solicitou á Tesourería Xeral da Seguridade Social o local situado na Casa do Mar de Baiona.
A súa cesión supuxo a estabilización das actividades como Centro de Rehabilitación Psicosocial na comarca do Val Miñor, configurando un servizo e unha nova sede de traballo que se manteñen ata a actualidade.
O condado e paradanta
No ano 2016 comeza a súa andaina nas comarcas do Condado, A Paradanta e o concello de Salceda de Caselas, dando resposta á petición das traballadoras sociais destas comarcas, que solicitaban unha atención especializada para dar unha solución á alarmante problemática de saúde mental que presentaba a súa poboación, derivada da falta de atención especializada e o número elevado de persoas con problemas desta índole.
Esta situación de gravidade estaba determinada pola falta de recursos específicos de atención á saúde mental na zona e ós problemas derivados das dificultades para acceder a eles (dispersión xeográfica, falta de transporte público, escasos medios económicos).
Como consecuencia desta necesidade detectada, no 2017 Avelaíña pon en marcha o Programa Achego que nace como un programa destinado a proporcionar unha atención individualizada para as persoas con problemas de saúde mental, atendéndoas dende a súa contorna e traballando dende unha perspectiva de proximidade, integral e comunitaria.
No mes de marzo de 2022 Avelaíña consegue abrir un Centro de Rehabilitación Psicosocial e Laboral no Concello de Ponteareas, sendo este o terceiro centro que abre a entidade.
Faite voluntario
Únete ao noso equipo de voluntarios e se parte da solución. Ofrecemos diferentes oportunidades para que poidas contribuír, segundo os teus intereses e habilidades.